MBUGHARỊ N’ỤTỌASỤSỤ IGBO: ATỤTỤ ỤTỌASỤSỤ MGBANWE

Abstract

Ụmịedemede Mbugharị bụ otu n’ime ụtọasụsụ mgbanwe. Mbugharị bụ mgbanwe n’ụtọasụsụ nke na-eme ka mkpụrụokwu si n’ọnọdụ ọ nọbụ n’ahịrịokwu gbanwee were ọnọdụ ọzọ n’otu ahịrịokwu ahụ. Ebumnobi nchọcha a bụ ịchọpụta ụdị mbugharị dị iche iche na etu ha si apụta ihe nakwa ihe kpatara e ji enwe mgbanwe n’ọnọdụ okwu nọbụ n’ahịrịokwu ọzọ. Usoro a gbasoro wee mee nchọcha a bụ usoro nkọwa Atụtụ ụtọasụsụ na-ekwu na ọ bụghị mgbe niile ka okwu niile na-enye ahịrịokwu echiche na-apụta ihe n’ihe a na-akpọpụta mgbe a na-ekwu okwu. Ndị na-akwado atụtụ a na-arụ ụka na tupu a kọwaa ahịrịokwu nke ọma, na a ga-agụsịta mkpụrụ okwu na mgbakwunye okwu niile na-enye ya bụ ahịrịokwu echiche, mgbe e mesiri nke a, a tụlee okwu mgbanwe e nwere na ndịna ndị a kpatara e ji wee kpọpụta ihe a kpọpụtara. Atụtụ ụtọasụsụ mgbanwe na-apụta ihe n’ụzọ anọ ndị a; mbugharị, mwepu, mgbakwunyere na mgbanweta. A chọpụtara na ọ bụ ewumewu usoro okwu na-ebute mgbanwe dị iche iche na-ewete mbugharị n’ahịrị okwu, nke a nwere ike ịpụta ihe n’ụdị mmafe mgbakwunye, ime okwu isi ụbụbọ na mgbanwe ọnọdụ nnara na orite. Nwa nchọcha tụrụ alo ma mee ka ndị mmadụ mata na ọ bụghị mgbe ọbụla ka ahịrịokwu na-enwe nghọta ma ọ bụ echiche n’agba ala ya n’ụtọsụsụ mgbanwe. Ọ bụ nke a mere o jiri dị mkpa na a ga-agbanwe ọdịdị ya, iji wee mee ka otu ọgbara okwu ahụ nwee ezi echiche ma kwe mkpọpụta, otu n’ime mgbanwe ahụ bụkwa ibugharị okwu ma ọ bụ mkpụrụokwu site n’otu akụkụ ahịrịokwu gaa n’akụkụ ọzọ.