NZIPỤTA ỌNỌDỤ EZINAỤLỌ: NTỤCHA EJIJE OBIDIEBUBE ỤFỌDỤ

Abstract

Nchọcha a lebara anya na Nzịpụta Ọnọdụ Ezinaụlọ: Ntụcha Ejije Obidiebube Ndị A Họọrọ. Ọ bụ ihe doro anya na ọnọdụ ezinaụlọ nwere ike ịbụ nke ọjọọ ma ọ bụ nke ọma, mana ndị mmadụ amaghị na n'ime ọnọdụ niile ndị a, na e nwere etu e si anafe na ha. Ebumnobi nchọcha a bụ izipụta ọnọdụ ezinaụlọ dị ka odee Obidiebube si gbaa ha n'anwụ, dị ka ileba anya na nsogbụ nwere ike ịdapụta n'ezinaụlọ, (amụtaghị nwa, amụtaghị nwa nwoke), etu akpachapụghị ọzụzụ ụmụaka anya si ebute ndọghachi maọbụ ntisa n'ezinaụlọ, etu nleghere ọrụ dịịrị nne ma ọ bụ nna si ebute ajọ ọnọdụ n'ezinaụlọ tinyere ihe ndị ọzọ. Nchọcha a bụ nke nkọwa. Atụtụ e jiri mee nchọcha a bụ atụtụ usoro ezinaụlọ nke Bowen wepụtara n'afọ 1950. Atụtụ a bụ atụtụ akparamaagwa mmadụ nke na-ahụta ezinaụlọ dị ka ebe e nwere mmetụta obi na njikọrọ, ma jirikwa echiche na-akọwapụta mmekọrịta dị ukwuu na-eme na ya. Ejije abụọ, ka a họọrọ mee nchọcha a nke bụ: Ọnọdụ Ugo na Nwaanyị Bụ Ihe Ukwu. A chọpụtara na ezinaụlọ ọ bụla, n'otu oge ma ọ bụ n'oge ọzọ na-anọ n'ọnọdụ abụọ; nke ọma na nke ọjọọ. Ọzọ, a chọpụtara na odee akwụkwọ ndị a họọrọ, zipụtara ihunanya n'ime ejije ya ka ihe na-enye aka eme ka ezinaụlọ ọ bụla kwudosie ike na nsogbụ ọ bụla dakwasara ha. Nchọcha a ga-enyere onye ọ bụla nwere ezinaụlọ aka ịhụta ọghọm na-adịịrị ndị na-ebute esemokwu n'ezinaụlọ. Ọ ga-emekwa ka ndi ọgụụ na-enwe mmasị ịgụ akwụkwọ ejije ma chọpụta ihe miri emi banyere ezinaụlọ. Ọzọ, ọ ga-enyere ndị abanyebeghị n'ezinaụlọ ma ọ bụ ndị na-akwado alụmalụ aka, ka ha mara na alụmalụ abụghị naanị ụtọ ka ọ na-atọ. Ndị nchọcha na-atụ aro ka ndị nwere otu nsogbụ ma ọ bụ ọzọ, ndị tinyere ezinaụlọ ha n'ajọ ọnọdụ, nabata mgbanwe na mmepe dị mma bataraala n'oge ugbua ma jiri ya gbanwee ọnọdụ ọjọọ dị n'ezinaụlọ ha.