ỊNYA ỌKỤ NWA N’ISIAMAIGBO AGỤLỤ: NZIPỤTA ỌṅỤ NWA

Abstract

Ụmịedemede: Ndị Igbo ghọtara na nwa bụ onyinye nke Chineke ji agọzi mmadụ. Ha kwenyekwara na agamnihu ezinaụlọ ọ bụla na-esite n’ọmụmụ. N’ihi nke a, oge ọ bụla a mụrụ nwa n’ezinaụlọ onye Igbo, ọ na-abụ ihe nnukwu aṅụrị. Ọ bụ aṅụrị a ka ndịIsiamaigbo Agụlụ na-ezipụta site na mmemme ịnya ọkụ nwa. Ịnya ọkụ nwa bụ mmemme nke ezinaụlọ mụrụ nwa ọhụrụ na-akpọkọ ụmụaka nwaanyị niile nọ n’ụmụnna ha, ka ha bịa soro ha ṅụrịa n’ihi nwa ọhụrụ ha mụtara.Ma ọ dị mwute na anghịzi eme ọmarịcha omenala a. Nke a emeela na ọtụtụ ụmụnwaanyị aghọtachaghịzi uru nwa bara na ọrụ hanwere n’ịzụlite nwa. Ọ na-emekwa ka ụfọdụ ndị mmadụ n’oge a na-emeso ụmụaka ọtụtụ ajọ omume dị iche iche. Ebumnobi nchọcha a bụ ịchọpụta ihe mere na anaghịkwa anya ọkụ nwa etu e si eme na mbụ. Ọzọ bụ ịgba n’anwụ etu ndị na-eme mmemme ịnya ọkụ nwa si eji ya egosi ọṅụ nwa tinyere ime ka ụmụaka ndị nwaanyị mata na ha nwere oke na ọrụ ha ketara n’ilekọta nwa. Nchọcha a bụ nke sọvee, a chịkọbara ya n’Isiamaigbo Agụlụ. Ndị njiri mee nchọcha a bụ ndị okenye na ụmụagbọghọmere mmemme a oge a ka na-eme ya. Nwanchọcha gbara ndị a ajụjụ ọnụ ma tụlegharịa ihe ndị odee ọzọ derela n’isiokwu yitere nke a. E ji atụtụ Ịntarakshọnism were zipụta na ịnya ọkụ nwa dị omimi n’ihi na ọ bụghị naanị na ọ na-ezipụta ọṅụ nwa kama na nwaanyị na nwa adịghị nkewa. Nchọpụta gosiri na anaghịzi eme mmemme ịnya ọkụ nwa nke ihe ndị kpatara ya gụnyere: mgbanwe n’usoro obibi ndụ ndị Igbo, ihe isiike, anyaụfụ, mmepe, na ndị ọzọ. A tụrụ anya na nchọcha a ga-eme ka ndị Igbo leghachi anya n’omenala ha ndị dị mma ghara iji ọsọ na-agbakwuru naanị omenala ndị mba ọzọ. Nke a ga-eme ka ezi echiche na akparamaagwa e ji mara Igbo ndị na-efunarị ha dịwakwa ire.