ǸGÀNÙSÒRÓ Ụ̀DÀÓLŪ NA AKARA ỤDAOLU

Abstract

Asụsụ ọbụla nwere ka usoro okwu ndị mebere ya si agakọrịta. Asụsụ Igbo nwere iwu na-achịkwa ngakọrịta mkpụrụụda na ibe ya, ngakọrịta usorookwu na ibe ya, d.g. Ọ bụ iwu ndị ahụ na-achịkwa ngakọrịta ụdaolu na akara ụdaoluka e nyochara n’ederede a kpọmkwem. Nsogbu kpaliri nchọcha a bụ na ọ na-agbagwoju ọtụtụ ndị anya etu ụdaolu si agakọrịta na etu e si amata akara ụdaolu kwesịrị ụdaolu ọbụla na mkpụrụokwu. Nchọcha sekere nke a n’ụzọ doro anya ka onye ọbụla gụrụ ya si na ya mata etu ụdaolu si agakọrịta.Mbunuche izugbe ọchọcha bụ igosi etu ụdaolu si agakọrịta na mkpụrụokwu Igbo na ịmata akara ụdaolu ndị na-agakọrịta na ndị adịghị agakọrịtanwu. E tinyere atụtụ agwara isi n’ọrụ wee mee nchọcha a. Atụtụ agwara isi bụ atụtụ a gbadoro ọkpa n’usoro ndokọ nkebi okwu wube. Onye wubere ya bụ Gazdar (1985).A kọwara ihe bụ nganusoro na njirimara ya. E zipụtakwara etu nganusoro si apụta ihe n’asụsụ Igbo. A chọpụtara n’ikpeazụ na ọ bụrụ na agbasoghị usoro ụdaolu, ụda mkpụrụokwu na-efu. A na-atụ aro na ndị ga-eme nchọcha na nganusoro n’ọdịnihu ga-emetụ aka na nganusoro metụtara mkpọaha, ngwaa na mmeju.